1Ti 3 | PltULB | STEP | Matokia izao teny izao: Raha misy olona iray maniry ny ho mpiandraikitra, dia maniry asa tsara izy.

1 Timothy 3

1 Matokia izao teny izao: Raha misy olona iray maniry ny ho mpiandraikitra, dia maniry asa tsara izy. 2 Noho izany dia ny mpiandraikitra dia tsy maintsy tsy manan-tsiny. Tsy maintsy manambady vehivavy tokana izy. Izy dia tokony hahay handajalanja, hendry, tia filaminana, tia mandray olona. Tsy maintsy mahay mampianatra izy. 3 Tsy tokony za-dratsy amin’ny divay izy, tsy mpila ady, fa kosa, malemy fanahy, feno fiadanam-po. Izy dia tsy tokony ho tia vola.

4 Tokony hitantana tsara ny tokantranony izy, ary ireo zanany dia tokony hanaiky azy am-panajana tanteraka. 5 Fa raha tsy mahay mitantana ny tokantranony izy, ahoana no hikarakarany ny fiangonan’Andriamanitra?

6 Tsy tokony ho olona vao niova fo izy, mba tsy hieboeboany ka ho lavo amin’ny fanamelohana tahaka ny devoly. 7 Izy ihany koa dia tsy maintsy tsara laza amin’ireo olona eny ivelany, mba tsy ho lavo anaty fahafaham-baraka sy ny fandriky ny devoly.

8 Ireo Diakona, toy izany ihany koa, dia tokony ho mendrika. Izy ireo dia tsy tokony hisotro divay be loatra na tsy mahalala onona ara-tsakafo. 9 Tokony hitazona ny fahamarinan’ny finoana nambara miaraka amin’ny feon’ny fieritreretana madio. 10 Izy ireo ihany koa dia tokony ho sedraina mialoha, avy eo dia tokony hanompo satria tsy manan-tsiny izy ireo.

11 Ireo vehivavy ihany koa dia tokony ho mendrika tahaka izany. Tsy tokony ho mpanendrikendrika izy ireo. Tokony hahay handanjalanja ary mahatoky amin’ny zavatra rehetra. 12 Ireo Diakona dia tokony hanambady vehivavy tokana. Tsy maintsy mitantana tsara ireo zanany sy ny tokantranony izy ireo. 13 Fa ireo izay nanompo tsara dia handray ny laza tsara sy fahatokisana lehibe amin’ny finoana ho an’ny tenan’izy ireo izay ao amin’i Jesosy Kristy.

14 Manoratra ireto zavatra ireto aminao aho, ary manantena ny ho avy tsy ho ela any aminao aho. 15 Fa raha tara aho, dia manoratra mba hahafantaranareo ny fitondran-tena ao amin’ny tokantranon’Andriamanitra, izay fiangonan’Andriamanitra velona, ilay vato fehizoro sy fiorenan’ny fahamarinana.

Tsy azo lavina fa ny fahamarinana nambara izay araka an’Andriamanitra dia lehibe: “Izy dia niseho tamin’ny nofo, nohamarinin’ny Fanahy, hitan’ny anjely, nambara teo anivon’ireo firenena, ninoan’izao tontolo izao, ary nasandratra tamim-boninahitra.”